«SEMO VECI, MARIA»

«SEMO VECI, MARIA»
di Marco Molinari

«Che granda e che uda che l'è sta casa
da quando anca l'ultima la n'è 'nda via.
Cusina e leto i ne bastaria.
Cosa dito Maria?».

La tase e intanto la se liga el grembial,
po' nel polar la ruze chè no le fa i oi,
e come farala a impastar i tortei
par dominica, quando a ven so fioi?

La para via el gato e po' la se senta,
la desfa la lana e la fa i gumisiei
e la me comanda: fa questo, fa quel,
e la me controla da sora i ociai.

Anca mi la controlo quando la fa da magnar,
e ghe cato i difeti al so fogazin,
però le la le sa ch'el fago a posta
e ch'el me piase pocià nel vin.

A mezodì la mete su l'aqua
E quando la buta la pasta me meto a pareciar
Magnema e po' dopo mi vao a leto a ponsar.
Le no. La ga sempre da far e brigar.

Me alzo che fora a ghe ancora la nebia.
Le l'è a la finestra 'ndrio far i calzeti
Con i ociai in orin su la ponta del naso.
Ogni tanto la supia... La scolto e taso...

«Cisà cosa la pensa quando la fa ch'i sospiri...
...Cisà cosa la vede quando la fisa fora...
El tempo pasà, i fioi, ...la so primavera?».
Po' impizo la luce chè l'è subito sera.

Con na scudela de cafelate,
noantri a le siè ema za zenà,
po' zughema a carte, a briscolon
e quando venzo, la dir che son n'imbroion.

Scoltema Bernaca e po 'ndema a leto.
E zercarse co' i piè ch'i è sempre ingiazadi,
e dirse i dolori che ne tien compagnia
l'è come dirse te voi ben. Semo veci, Maria.

Marco Molinari